ਸ਼ੁੱਕਰਵਾਰ ਰਾਤ ਨੂੰ ਸ਼ਹਿਰ ਦੀ ਇੰਦਰਾ ਕਲੋਨੀ ਵਿੱਚ ਇੱਕ ਵਿਅਕਤੀ ਨੇ ਨਾਜਾਇਜ਼ ਸਬੰਧਾਂ ਦੇ ਸ਼ੱਕ ਵਿੱਚ ਆਪਣੀ ਪਤਨੀ ਦੇ ਸਿਰ 'ਤੇ ਚਟਨੀ ਕੁੱਟਣ ਵਾਲੀ ਕੂੰਡੀ ਨਾਲ ਵਾਰ ਕਰਕੇ ਉਸ ਦੀ ਹੱਤਿਆ ਕਰ ਦਿੱਤੀ। ਮ੍ਰਿਤਕ ਇੱਕ ਨਿੱਜੀ ਸਕੂਲ ਵਿੱਚ ਸਫ਼ਾਈ ਸੇਵਕ ਸੀ, ਜਦੋਂ ਕਿ ਦੋਸ਼ੀ ਰਾਜਮਿਸਤਰੀ ਦਾ ਕੰਮ ਕਰਦਾ ਹੈ।ਕਤਲ ਤੋਂ ਬਾਅਦ ਦੋਸ਼ੀ ਨੇ ਘਰ ਦੀ ਕੰਧ 'ਤੇ ਲਿਖਿਆ ਕਿ ਹੁਣ ਸੂਰਜ ਤੇ ਸੋਨੂੰ ਦੀ ਵਾਰੀ ਹੈ। ਨਰਵਾਣਾ ਸ਼ਹਿਰ ਪੁਲਿਸ ਸਟੇਸ਼ਨ ਨੇ ਪਤੀ ਵਿਰੁੱਧ ਕਤਲ ਦਾ ਮਾਮਲਾ ਦਰਜ ਕਰ ਲਿਆ ਹੈ।

ਉੱਤਰ ਪ੍ਰਦੇਸ਼ ਦੇ ਗਾਜ਼ੀਆਬਾਦ ਦੀ ਪੂਜਾ ਕਲੋਨੀ ਦੀ ਰਹਿਣ ਵਾਲੀ ਰਿੰਕੀ ਨੇ ਸਿਟੀ ਪੁਲਿਸ ਸਟੇਸ਼ਨ ਨਰਵਾਣਾ ਵਿੱਚ ਸ਼ਿਕਾਇਤ ਦਿੱਤੀ ਕੀਤੀ ਕਿ ਉਸ ਦੀ 28 ਸਾਲਾ ਭੈਣ ਨੇਹਾ ਦਾ ਵਿਆਹ ਲਗਪਗ 11 ਸਾਲ ਪਹਿਲਾਂ ਫਤਿਹਾਬਾਦ ਜ਼ਿਲ੍ਹੇ ਦੇ ਭੂਨਾ ਦੇ ਰਹਿਣ ਵਾਲੇ ਸੂਰਜ ਨਾਲ ਹੋਇਆ ਸੀ। ਇੱਕ ਸਾਲ ਪਹਿਲਾਂ ਪਤੀ-ਪਤਨੀ ਨਰਵਾਣਾ ਦੀ ਇੰਦਰਾ ਕਲੋਨੀ ਵਿੱਚ ਕਿਰਾਏ ਦੇ ਮਕਾਨ ਵਿੱਚ ਰਹਿਣ ਲੱਗ ਪਏ। ਸੂਰਜ ਆਪਣੀ ਪਤਨੀ ਨੇਹਾ 'ਤੇ ਸ਼ੱਕ ਕਰਦਾ ਸੀ। ਜੇ ਉਹ ਫ਼ੋਨ 'ਤੇ ਪਰਿਵਾਰ ਦੇ ਮੈਂਬਰਾਂ ਨਾਲ ਗੱਲ ਵੀ ਕਰਦੀ ਤਾਂ ਵੀ ਉਹ ਉਸ ਵੱਲ ਸ਼ੱਕ ਦੀ ਨਜ਼ਰ ਨਾਲ ਦੇਖਦਾ ਸੀ। ਇਸ ਕਾਰਨ ਸੂਰਜ ਦਾ 15-20 ਦਿਨ ਪਹਿਲਾਂ ਝਗੜਾ ਹੋਇਆ ਤੇ ਉਸ ਨੇ ਨੇਹਾ 'ਤੇ ਹਮਲਾ ਕਰ ਦਿੱਤਾ। ਇਸ ਤੋਂ ਬਾਅਦ ਨੇਹਾ ਆਪਣੇ ਬੱਚਿਆਂ ਨੂੰ ਲੈ ਕੇ ਪਿੰਡ ਖਰਲ ਵਿੱਚ ਆਪਣੀ ਛੋਟੀ ਭੈਣ ਮੰਜੂ ਕੋਲ ਚਲੀ ਗਈ। ਸੂਰਜ ਨੂੰ ਇਸ ਬਾਰੇ ਪਤਾ ਲੱਗਾ ਤੇ ਉਸ ਨੇ ਫ਼ੋਨ ਕੀਤਾ।