ਪ੍ਰਸਿੱਧ ਅਦਾਕਾਰ ਆਮਿਰ ਖ਼ਾਨ ਨੇ ਆਪਣੀ ਲੰਬੇ ਸਮੇਂ ਦੀ ਸਾਥੀ ਗੌਰੀ ਸਪ੍ਰੈਟ ਨਾਲ ਇੱਕ ਨਿੱਜੀ ਸਮਾਰੋਹ ਦੌਰਾਨ ਵਿਆਹ ਕਰ ਲਿਆ ਹੈ। ਮੁੰਬਈ ਦੇ ਬਾਂਦਰਾ ਸਥਿਤ ਆਪਣੇ ਨਿਵਾਸ 'ਤੇ ਐਤਵਾਰ ਨੂੰ ਹੋਏ ਇਸ ਸਮਾਗਮ ਵਿੱਚ ਦੋਵਾਂ ਦੇ ਪਰਿਵਾਰਕ ਮੈਂਬਰਾਂ ਅਤੇ ਕਰੀਬੀ ਦੋਸਤਾਂ ਦੀ ਮੌਜੂਦਗੀ ਵਿੱਚ ਵਿਆਹ ਦੀਆਂ ਸਾਰੀਆਂ ਰਸਮਾਂ ਸਾਦਗੀ ਨਾਲ ਨਿਭਾਈਆਂ ਗਈਆਂ। ਵਿਆਹ ਸਮਾਰੋਹ ਨੂੰ ਪੂਰੀ ਤਰ੍ਹਾਂ ਨਿੱਜੀ ਰੱਖਿਆ ਗਿਆ ਸੀ। ਇਸ ਮੌਕੇ 'ਤੇ ਆਮਿਰ ਖ਼ਾਨ ਦੇ ਪਹਿਲਾਂ ਦੇ ਵਿਆਹਾਂ ਤੋਂ ਹੋਏ ਉਨ੍ਹਾਂ ਦੇ ਬੱਚੇ ਵੀ ਮੌਜੂਦ ਰਹੇ। ਵਿਆਹ ਸ਼ੁਰੂ ਹੋਣ ਤੋਂ ਪਹਿਲਾਂ ਉਨ੍ਹਾਂ ਦੀ ਧੀ ਇਰਾ ਖ਼ਾਨ ਅਤੇ ਪੁੱਤਰ ਜੁਨੈਦ ਖ਼ਾਨ ਨੂੰ ਨਿਵਾਸ ਸਥਾਨ 'ਤੇ ਪਹੁੰਚਦੇ ਦੇਖਿਆ ਗਿਆ। ਇਸ ਤੋਂ ਇਲਾਵਾ ਪ੍ਰਸਿੱਧ ਫ਼ਿਲਮ ਨਿਰਦੇਸ਼ਕ ਆਸ਼ੂਤੋਸ਼ ਗੋਵਾਰੀਕਰ ਅਤੇ ਅਦਾਕਾਰਾ ਐਲੀ ਅਵਰਾਮ ਸਮੇਤ ਕੁਝ ਚੁਣਿੰਦੇ ਮਹਿਮਾਨਾਂ ਨੇ ਵੀ ਇਸ ਖ਼ਾਸ ਮੌਕੇ ਦੀ ਰੌਣਕ ਵਧਾਈ।

ਆਮਿਰ ਖ਼ਾਨ ਅਤੇ ਗੌਰੀ ਸਪ੍ਰੈਟ ਦੀ ਜਾਣ-ਪਛਾਣ ਲਗਭਗ ਪੱਚੀ ਸਾਲ ਪਹਿਲਾਂ ਹੋਈ ਸੀ। ਹਾਲਾਂਕਿ, ਦੋਵਾਂ ਦੇ ਰਿਸ਼ਤੇ ਨੇ ਨਵਾਂ ਮੋੜ ਸਾਲ 2024 ਵਿੱਚ ਲਿਆ, ਜਦੋਂ ਆਮਿਰ ਦੀ ਚਚੇਰੀ ਭੈਣ ਨੁਜ਼ਹਤ ਖ਼ਾਨ ਰਾਹੀਂ ਦੋਵੇਂ ਬੈਂਗਲੁਰੂ ਵਿੱਚ ਮੁੜ ਮਿਲੇ। ਉਸ ਸਮੇਂ ਗੌਰੀ ਬੈਂਗਲੁਰੂ ਵਿੱਚ ਰਹਿ ਰਹੀ ਸੀ। ਇਸ ਤੋਂ ਬਾਅਦ ਦੋਵਾਂ ਨੇ ਕਰੀਬ ਇੱਕ ਸਾਲ ਤੱਕ ਦੂਰ-ਦੁਰਾਡੇ ਰਹਿੰਦਿਆਂ ਆਪਣੇ ਰਿਸ਼ਤੇ ਨੂੰ ਅੱਗੇ ਵਧਾਇਆ। ਮਾਰਚ 2025 ਵਿੱਚ ਆਪਣੇ ਸੱਠਵੇਂ ਜਨਮਦਿਨ ਮੌਕੇ ਆਯੋਜਿਤ ਸਮਾਗਮ ਦੌਰਾਨ ਆਮਿਰ ਖ਼ਾਨ ਨੇ ਪਹਿਲੀ ਵਾਰ ਜਨਤਕ ਤੌਰ 'ਤੇ ਗੌਰੀ ਸਪ੍ਰੈਟ ਨੂੰ ਆਪਣੀ ਜੀਵਨ ਸਾਥੀ ਵਜੋਂ ਸਭ ਦੇ ਸਾਹਮਣੇ ਪੇਸ਼ ਕੀਤਾ ਸੀ। ਇਸ ਤੋਂ ਬਾਅਦ ਦੋਵਾਂ ਦੇ ਵਿਆਹ ਦੀਆਂ ਚਰਚਾਵਾਂ ਲਗਾਤਾਰ ਜਾਰੀ ਸਨ, ਜਿਨ੍ਹਾਂ 'ਤੇ ਹੁਣ ਵਿਆਹ ਨਾਲ ਅਧਿਕਾਰਕ ਮੋਹਰ ਲੱਗ ਗਈ ਹੈ।

ਆਮਿਰ ਖ਼ਾਨ ਦੇ ਨਿੱਜੀ ਜੀਵਨ ਦੀ ਗੱਲ ਕਰੀਏ ਤਾਂ ਉਨ੍ਹਾਂ ਦਾ ਪਹਿਲਾ ਵਿਆਹ ਰੀਨਾ ਦੱਤਾ ਨਾਲ ਹੋਇਆ ਸੀ। ਇਸ ਵਿਆਹ ਤੋਂ ਉਨ੍ਹਾਂ ਦੇ ਦੋ ਬੱਚੇ ਜੁਨੈਦ ਖ਼ਾਨ ਅਤੇ ਇਰਾ ਖ਼ਾਨ ਹਨ। ਕਰੀਬ ਸੋਲ੍ਹਾਂ ਸਾਲ ਇਕੱਠੇ ਰਹਿਣ ਤੋਂ ਬਾਅਦ ਦੋਵੇਂ ਵੱਖ ਹੋ ਗਏ ਸਨ। ਇਸ ਤੋਂ ਬਾਅਦ ਆਮਿਰ ਖ਼ਾਨ ਨੇ ਕਿਰਨ ਰਾਓ ਨਾਲ ਵਿਆਹ ਕੀਤਾ। ਦੋਵਾਂ ਦੇ ਘਰ ਪੁੱਤਰ ਆਜ਼ਾਦ ਰਾਓ ਦਾ ਜਨਮ ਹੋਇਆ। ਵਿਆਹ ਦੇ ਲਗਭਗ ਸੋਲ੍ਹਾਂ ਸਾਲ ਬਾਅਦ ਸਾਲ 2021 ਵਿੱਚ ਦੋਵਾਂ ਨੇ ਆਪਸੀ ਸਹਿਮਤੀ ਨਾਲ ਵੱਖ ਹੋਣ ਦਾ ਐਲਾਨ ਕੀਤਾ ਸੀ। ਉਸ ਸਮੇਂ ਵੀ ਦੋਵਾਂ ਨੇ ਸਪੱਸ਼ਟ ਕੀਤਾ ਸੀ ਕਿ ਉਹ ਆਪਣੇ ਪੁੱਤਰ ਦੀ ਪਰਵਰਿਸ਼ ਮਿਲ ਕੇ ਕਰਨਗੇ ਅਤੇ ਪੇਸ਼ੇਵਰ ਤੌਰ 'ਤੇ ਵੀ ਇਕੱਠੇ ਕੰਮ ਕਰਦੇ ਰਹਿਣਗੇ। ਹੁਣ ਗੌਰੀ ਸਪ੍ਰੈਟ ਨਾਲ ਵਿਆਹ ਤੋਂ ਬਾਅਦ ਆਮਿਰ ਖ਼ਾਨ ਨੇ ਆਪਣੇ ਜੀਵਨ ਦੀ ਇੱਕ ਨਵੀਂ ਸ਼ੁਰੂਆਤ ਕੀਤੀ ਹੈ। ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਅਤੇ ਫ਼ਿਲਮ ਜਗਤ ਨਾਲ ਜੁੜੀਆਂ ਕਈ ਸ਼ਖ਼ਸੀਅਤਾਂ ਵੱਲੋਂ ਇਸ ਨਵੇਂ ਸਫ਼ਰ ਲਈ ਜੋੜੇ ਨੂੰ ਵਧਾਈਆਂ ਦਿੱਤੀਆਂ ਜਾ ਰਹੀਆਂ ਹਨ।