ਨਵੀਂ ਦਿੱਲੀ, 23 ਦਸੰਬਰ 2025 :- ਭਾਰਤੀ ਟੀਮ ਦੇ ਸਾਬਕਾ ਕ੍ਰਿਕਟਰ ਰੌਬਿਨ ਉਥੱਪਾ ਨੇ ਆਗਾਮੀ ਟੀ-20 ਵਰਲਡ ਕੱਪ ਲਈ ਸ਼ੁਭਮਨ ਗਿੱਲ ਦੀ ਚੋਣ ਨਾ ਹੋਣ ‘ਤੇ ਹੈਰਾਨੀ ਪ੍ਰਗਟਾਈ ਹੈ। ਗਿੱਲ ਦੀ ਚੋਣ ਲਗਪਗ ਤੈਅ ਮੰਨੀ ਜਾ ਰਹੀ ਸੀ ਕਿਉਂਕਿ ਉਨ੍ਹਾਂ ਨੂੰ ਭਾਰਤੀ ਟੀ-20 ਟੀਮ ਦੀ ਉਪ-ਕਪਤਾਨੀ ਸੌਂਪੀ ਗਈ ਸੀ ਅਤੇ ਓਪਨਰ ਵਜੋਂ ਵੀ ਦੇਖਿਆ ਜਾ ਰਿਹਾ ਸੀ।

ਹਾਲਾਂਕਿ, ਗਿੱਲ ਫਾਰਮ ਨਾਲ ਜੂਝਦੇ ਨਜ਼ਰ ਆਏ। 26 ਸਾਲਾ ਗਿੱਲ ਨੇ ਵਾਪਸੀ ਤੋਂ ਬਾਅਦ 15 ਟੀ-20 ਅੰਤਰਰਾਸ਼ਟਰੀ ਮੈਚਾਂ ਵਿੱਚ 24.25 ਦੀ ਔਸਤ ਨਾਲ ਸਿਰਫ 291 ਰਨ ਬਣਾਏ। ਦੱਖਣੀ ਅਫਰੀਕਾ ਵਿਰੁੱਧ ਹਾਲ ਹੀ ਵਿੱਚ ਹੋਈ ਸੀਰੀਜ਼ ਵਿੱਚ ਵੀ ਉਹ ਤਿੰਨ ਮੈਚਾਂ ਵਿੱਚ ਸਿਰਫ 32 ਦੌੜਾਂ ਹੀ ਬਣਾ ਸਕੇ ਅਤੇ ਫਿਰ ਸੱਟ ਕਾਰਨ ਬਾਹਰ ਹੋ ਗਏ।

ਦੱਸ ਦੇਈਏ ਕਿ ਭਾਰਤ ਨੇ ਟੀ-20 ਵਰਲਡ ਕੱਪ 2026 ਲਈ ਆਪਣੀ ਟੀਮ ਦਾ ਐਲਾਨ ਕਰ ਦਿੱਤਾ ਹੈ, ਜਿਸ ਵਿੱਚ ਸ਼ੁਭਮਨ ਗਿੱਲ ਅਤੇ ਵਿਕਟਕੀਪਰ ਬੱਲੇਬਾਜ਼ ਜਿਤੇਸ਼ ਸ਼ਰਮਾ ਨੂੰ ਬਾਹਰ ਰੱਖਿਆ ਗਿਆ ਹੈ। ਇਨ੍ਹਾਂ ਦੀ ਜਗ੍ਹਾ ਇਸ਼ਾਨ ਕਿਸ਼ਨ ਅਤੇ ਰਿੰਕੂ ਸਿੰਘ ਨੂੰ ਸ਼ਾਮਲ ਕੀਤਾ ਗਿਆ ਹੈ।

ਉਥੱਪਾ ਨੇ ਕੀ ਕਿਹਾ?

ਰੌਬਿਨ ਉਥੱਪਾ ਨੇ ਆਪਣੇ ਯੂਟਿਊਬ ਚੈਨਲ ‘ਤੇ ਕਿਹਾ ਕਿ ਭਾਰਤੀ ਕ੍ਰਿਕਟ ਇਸ ਸਮੇਂ ਅਜਿਹੀ ‘ਅਣਜਾਣ ਜਗ੍ਹਾ’ ਬਣ ਗਈ ਹੈ ਜਿੱਥੇ ਕੁਝ ਵੀ ਅੰਦਾਜ਼ਾ ਲਗਾਉਣਾ ਮੁਸ਼ਕਲ ਹੈ।

“ਭਾਰਤੀ ਕ੍ਰਿਕਟ ਇੱਕ ਅਣਜਾਣ ਜਗ੍ਹਾ ਹੈ। ਤੁਸੀਂ ਸੋਚਦੇ ਹੋ ਕਿ ਕੋਈ ਅੰਦਾਜ਼ਾ ਕੰਮ ਕਰੇਗਾ ਪਰ ਟੀਮ ਕੁਝ ਹੋਰ ਹੀ ਨਿਕਲਦੀ ਹੈ। ਮੈਂ ਇਹ ਨਹੀਂ ਕਹਿ ਰਿਹਾ ਕਿ ਇਹ ਟੀਮ ਮਾੜੀ ਹੈ ਪਰ ਕਈਆਂ ਦੇ ਦਿਲ ਜ਼ਰੂਰ ਟੁੱਟੇ ਹਨ। ਜੋ ਵੀ ਕ੍ਰਿਕਟ ਖੇਡਦਾ ਹੈ, ਉਹ ਜਾਣਦਾ ਹੈ ਕਿ ਸ਼ੁਭਮਨ ਗਿੱਲ ਅਤੇ ਜਿਤੇਸ਼ ਸ਼ਰਮਾ ਨੂੰ ਕਿੰਨਾ ਬੁਰਾ ਲੱਗ ਰਿਹਾ ਹੋਵੇਗਾ। ਮੇਰੀ ਹਮਦਰਦੀ ਉਨ੍ਹਾਂ ਦੇ ਨਾਲ ਹੈ।”

ਗਿੱਲ ਲਈ ਮਹਿਸੂਸ ਹੋਇਆ ਬੁਰਾ

ਉਥੱਪਾ ਨੇ ਅੱਗੇ ਕਿਹਾ, ‘ਸ਼ੁਭਮਨ ਗਿੱਲ ਲਈ ਬੁਰਾ ਲੱਗਦਾ ਹੈ ਕਿਉਂਕਿ ਉਹ ਟੈਸਟ ਅਤੇ ਵਨਡੇ ਟੀਮ ਦੇ ਕਪਤਾਨ ਹਨ। ਮੈਨੂੰ ਲੱਗਦਾ ਸੀ ਕਿ ਭਾਵੇਂ ਉਨ੍ਹਾਂ ਤੋਂ ਉਪ-ਕਪਤਾਨੀ ਲੈ ਲਈ ਜਾਂਦੀ ਪਰ ਉਨ੍ਹਾਂ ਨੂੰ ਤੀਜੇ ਓਪਨਰ ਵਜੋਂ ਟੀਮ ਵਿੱਚ ਜ਼ਰੂਰ ਰੱਖਣਾ ਚਾਹੀਦਾ ਸੀ।’

ਵੱਧਦੇ ਸਰਪ੍ਰਾਈਜ਼ ‘ਤੇ ਚਿੰਤਾ

ਉਥੱਪਾ ਨੇ ਸੰਜੂ ਸੈਮਸਨ ਅਤੇ ਅਭਿਸ਼ੇਕ ਸ਼ਰਮਾ ਦੀ ਚੋਣ ‘ਤੇ ਖੁਸ਼ੀ ਤਾਂ ਜਤਾਈ ਪਰ ਨਾਲ ਹੀ ਸਵਾਲ ਵੀ ਚੁੱਕੇ। ਉਨ੍ਹਾਂ ਕਿਹਾ ਕਿ ਜੇਕਰ ਇਸ਼ਾਨ ਕਿਸ਼ਨ ਓਪਨਿੰਗ ਕਰਦੇ ਹਨ ਤਾਂ ਸੰਜੂ ਦੀ ਜਗ੍ਹਾ ਕਿੱਥੇ ਹੋਵੇਗੀ? ਉਨ੍ਹਾਂ ਚਿੰਤਾ ਜਤਾਈ ਕਿ ਟੀਮ ਵਿੱਚ ਵਾਰ-ਵਾਰ ਹੋਣ ਵਾਲੇ ਬਦਲਾਅ ਖਿਡਾਰੀਆਂ ਵਿੱਚ ‘ਅਸੁਰੱਖਿਆ ਦੀ ਭਾਵਨਾ’ ਪੈਦਾ ਕਰ ਸਕਦੇ ਹਨ।