March 17, 2026
Punjab Speaks Team / Panjab
ਨਵੀਂ ਦਿੱਲੀ, 17 ਮਾਰਚ 2026 :- ਈਰਾਨ ਅਤੇ ਅਮਰੀਕਾ (Iran-America War) ਵਿਚਾਲੇ ਜੰਗ ਕਾਰਨ ਕੱਚੇ ਤੇਲ (Crude Supply) ਦੀ ਸਪਲਾਈ ਪ੍ਰਭਾਵਿਤ ਹੋਣ ਅਤੇ ਕੀਮਤਾਂ ਵਧਣ ਦੇ ਚਲਦਿਆਂ, ਭਾਰਤ ਦੀਆਂ ਸਰਕਾਰੀ ਤੇਲ ਮਾਰਕੀਟਿੰਗ ਕੰਪਨੀਆਂ (OMCs) ਨੇ ਰਿਟੇਲ ਆਊਟਲੈਟਸ (ਪੈਟਰੋਲ ਪੰਪ ਡੀਲਰਾਂ) ਨੂੰ ਉਧਾਰ ‘ਤੇ ਈਧਨ ਸਪਲਾਈ ਸਸਪੈਂਡ ਕਰ ਦਿੱਤੀ ਹੈ ਅਤੇ ਭੁਗਤਾਨ ਦੀਆਂ ਸ਼ਰਤਾਂ ਨੂੰ ਸਖ਼ਤ ਕਰ ਦਿੱਤਾ ਹੈ। ‘ਮਿੰਟ’ (Mint) ਦੀ ਰਿਪੋਰਟ ‘ਚ 4 ਸਰੋਤਾਂ ਦੇ ਹਵਾਲੇ ਨਾਲ ਇਹ ਦਾਅਵਾ ਕੀਤਾ ਗਿਆ ਹੈ। ਕੇਂਦਰੀ ਪੈਟਰੋਲੀਅਮ ਮੰਤਰਾਲੇ ਅਤੇ ਤੇਲ ਮਾਰਕੀਟਿੰਗ ਕੰਪਨੀਆਂ ਨੇ ਮਿੰਟ ਦੇ ਸਵਾਲਾਂ ਦਾ ਜਵਾਬ ਨਹੀਂ ਦਿੱਤਾ ਹੈ। ਜਾਗਰਣ ਬਿਜ਼ਨੈੱਸ ਸੁਤੰਤਰ ਤੌਰ ‘ਤੇ ਇਸ ਰਿਪੋਰਟ ਦੀ ਪੁਸ਼ਟੀ ਨਹੀਂ ਕਰਦਾ।
ਨਾਂ ਨਾ ਛਾਪਣ ਦੀ ਸ਼ਰਤ ‘ਤੇ ਸਰੋਤਾਂ ਨੇ ਦੱਸਿਆ ਕਿ ਹਿੰਦੁਸਤਾਨ ਪੈਟਰੋਲੀਅਮ ਕਾਰਪੋਰੇਸ਼ਨ ਲਿਮਟਿਡ (HPCL) ਅਤੇ ਭਾਰਤ ਪੈਟਰੋਲੀਅਮ ਕਾਰਪੋਰੇਸ਼ਨ ਲਿਮਟਿਡ (BPCL) ਨੇ ਪਿਛਲੇ ਹਫ਼ਤੇ ਤੋਂ ਐਡਵਾਂਸ ਪੇਮੈਂਟ (ਅਗਾਊਂ ਭੁਗਤਾਨ) ‘ਤੇ ਜ਼ੋਰ ਦੇਣਾ ਸ਼ੁਰੂ ਕਰ ਦਿੱਤਾ ਸੀ, ਜਦੋਂ ਕਿ ਇੰਡੀਅਨ ਆਇਲ ਕਾਰਪੋਰੇਸ਼ਨ ਲਿਮਟਿਡ (IOCL) ਨੇ ਸੋਮਵਾਰ ਨੂੰ ਆਪਣੀ ਪੰਜ ਦਿਨਾਂ ਦੀ ‘ਰਿਵਾਲਵਿੰਗ ਕ੍ਰੈਡਿਟ ਪਾਲਿਸੀ’ ਨੂੰ ਰੋਕ ਦਿੱਤਾ।
ਪੇਮੈਂਟ ਸਿਸਟਮ ‘ਚ ਵੱਡੀ ਤਬਦੀਲੀ
ਤੇਲ ਮਾਰਕੀਟਿੰਗ ਕੰਪਨੀਆਂ ਦਾ ਇਹ ਕਦਮ ਪਹਿਲਾਂ ਤੋਂ ਚੱਲ ਰਹੇ ਸਿਸਟਮ ‘ਚ ਇਕ ਵੱਡੀ ਤਬਦੀਲੀ ਹੈ ਜਿਸ ਤਹਿਤ ਡੀਲਰਾਂ ਨੂੰ ਈਧਨ ਖਰੀਦਣ ਲਈ ਸ਼ਾਰਟ ਟਰਮ ਕ੍ਰੈਡਿਟ ਦੀ ਇਜਾਜ਼ਤ ਸੀ। ਇਹ ਫੈਸਲਾ ਕਾਫ਼ੀ ਅਹਿਮ ਹੈ ਕਿਉਂਕਿ ਇਹ ਤਿੰਨੋਂ ਤੇਲ ਤੇ ਗੈਸ ਕੰਪਨੀਆਂ ਭਾਰਤ ਦੇ ਲਗਪਗ 100,000 ਪੈਟਰੋਲ ਪੰਪਾਂ ਵਿੱਚੋਂ ਜ਼ਿਆਦਾਤਰ ਨੂੰ ਈਧਨ ਸਪਲਾਈ ਕਰਦੀਆਂ ਹਨ।
ਪੱਛਮੀ ਏਸ਼ੀਆ ‘ਚ ਚੱਲ ਰਹੇ ਸੰਘਰਸ਼ ਨੇ ਭਾਰਤ ਦੇ ਲਗਪਗ 40% ਕੱਚੇ ਤੇਲ ਦੀ ਸਪਲਾਈ ਦੇ ਰੂਟਾਂ ਨੂੰ ਪ੍ਰਭਾਵਿਤ ਕਰ ਦਿੱਤਾ ਹੈ, ਜਿਸ ਨਾਲ ਦੁਨੀਆ ਦੇ ਤੀਜੇ ਸਭ ਤੋਂ ਵੱਡੇ ਤੇਲ ਖਪਤਕਾਰ ਦੇਸ਼ ਭਾਰਤ ਲਈ ਚਿੰਤਾਵਾਂ ਵਧ ਗਈਆਂ ਹਨ। ਵਿੱਤੀ ਸਾਲ 2027 ਤਕ ਭਾਰਤ ‘ਚ ਪੈਟਰੋਲੀਅਮ ਉਤਪਾਦਾਂ ਦੀ ਮੰਗ 250.8 ਮਿਲੀਅਨ ਟਨ ਤਕ ਪਹੁੰਚਣ ਦਾ ਅਨੁਮਾਨ ਹੈ।
Payment First Oil Later OMCs Changed The Rules During The War
