ਨਵੀਂ ਦਿੱਲੀ, 31 ਦਸੰਬਰ 2025 :- ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਜੌਨ ਐਫ ਕੈਨੇਡੀ ਦੀ ਪੋਤੀ ਅਤੇ ਮਸ਼ਹੂਰ ਵਾਤਾਵਰਣ ਪੱਤਰਕਾਰ ਤਾਤੀਆਨਾ ਸ਼ਲੌਸਬਰਗ ਦਾ ਮੰਗਲਵਾਰ ਸਵੇਰੇ ਕੈਂਸਰ ਕਾਰਨ ਦੇਹਾਂਤ ਹੋ ਗਿਆ। ਉਹ ਸਿਰਫ਼ 35 ਸਾਲਾਂ ਦੇ ਸਨ।

ਇਹ ਦੁਖਦਾਈ ਖ਼ਬਰ ਉਨ੍ਹਾਂ ਦੇ ਪਰਿਵਾਰ ਨੇ ਜੌਨ ਐਫ ਕੈਨੇਡੀ ਲਾਇਬ੍ਰੇਰੀ ਫਾਊਂਡੇਸ਼ਨ ਦੇ ਇੰਸਟਾਗ੍ਰਾਮ ਅਕਾਊਂਟ ‘ਤੇ ਸਾਂਝੀ ਕੀਤੀ ਹੈ। ਪਰਿਵਾਰ ਦੇ ਬਿਆਨ ਵਿੱਚ ਲਿਖਿਆ ਹੈ, “ਸਾਡੀ ਖ਼ੂਬਸੂਰਤ ਤਾਤੀਆਨਾ ਅੱਜ ਸਵੇਰੇ ਸਾਨੂੰ ਵਿਛੋੜਾ ਦੇ ਗਈ। ਉਹ ਹਮੇਸ਼ਾ ਸਾਡੇ ਦਿਲਾਂ ਵਿੱਚ ਰਹੇਗੀ।”

ਤਾਤੀਆਨਾ ਦੀ ਮੌਤ ਦੀ ਖ਼ਬਰ ਨਾਲ ਪੂਰੀ ਦੁਨੀਆ ਵਿੱਚ ਸੋਗ ਦੀ ਲਹਿਰ ਦੌੜ ਗਈ। ਉਹ ਇੱਕ ਬਹੁਤ ਹੀ ਪ੍ਰਤਿਭਾਸ਼ਾਲੀ ਪੱਤਰਕਾਰ ਸੀ, ਜੋ ਜਲਵਾਯੂ ਪਰਿਵਰਤਨ ਅਤੇ ਵਾਤਾਵਰਣ ਦੇ ਮੁੱਦਿਆਂ ‘ਤੇ ਡੂੰਘਾਈ ਨਾਲ ਲਿਖਦੀ ਸੀ।

ਪਰਿਵਾਰ ਦਾ ਕਦੇ ਨਾ ਖਤਮ ਹੋਣ ਵਾਲਾ ਦਰਦ

ਪਰਿਵਾਰ ਨੇ ਇੱਕ ਭਾਵੁਕ ਬਿਆਨ ਰਾਹੀਂ ਤਾਤੀਆਨਾ ਨੂੰ ਯਾਦ ਕੀਤਾ। ਇਹ ਪੋਸਟ ਉਨ੍ਹਾਂ ਦੇ ਪਤੀ ਜਾਰਜ ਮੋਰਨ, ਬੱਚਿਆਂ, ਮਾਤਾ-ਪਿਤਾ ਕੈਰੋਲਿਨ ਕੈਨੇਡੀ ਅਤੇ ਐਡਵਿਨ ਸ਼ਲੌਸਬਰਗ, ਅਤੇ ਭੈਣ-ਭਰਾ ਜੈਕ ਤੇ ਰੋਜ਼ ਸਮੇਤ ਪੂਰੇ ਪਰਿਵਾਰ ਵੱਲੋਂ ਸਾਂਝੀ ਕੀਤੀ ਗਈ ਸੀ। ਤਾਤੀਆਨਾ ਦੇ ਦੋ ਛੋਟੇ ਬੱਚੇ ਹਨ—ਇੱਕ ਬੇਟਾ ਅਤੇ ਇੱਕ ਬੇਟੀ।

ਉਨ੍ਹਾਂ ਦੀ ਬੇਟੀ ਦਾ ਜਨਮ ਮਈ 2024 ਵਿੱਚ ਹੋਇਆ ਸੀ ਅਤੇ ਠੀਕ ਉਸੇ ਸਮੇਂ ਉਨ੍ਹਾਂ ਦੀ ਬਿਮਾਰੀ ਦਾ ਪਤਾ ਲੱਗਾ ਸੀ। ਤਾਤੀਆਨਾ ਦੀ ਮਾਂ ਕੈਰੋਲਿਨ ਕੈਨੇਡੀ ਸਾਬਕਾ ਰਾਜਦੂਤ ਹਨ। ਕੈਨੇਡੀ ਪਰਿਵਾਰ ਪਹਿਲਾਂ ਹੀ ਕਈ ਤ੍ਰਾਸਦੀਆਂ ਵਿੱਚੋਂ ਗੁਜ਼ਰ ਚੁੱਕਾ ਹੈ ਅਤੇ ਇਹ ਦੁੱਖ ਉਨ੍ਹਾਂ ਲਈ ਇੱਕ ਹੋਰ ਗਹਿਰਾ ਸਦਮਾ ਹੈ।

ਬਿਮਾਰੀ ਦਾ ਪਤਾ ਕਦੋਂ ਲੱਗਾ?

ਤਾਤੀਆਨਾ ਨੂੰ ਮਈ 2024 ਵਿੱਚ ਆਪਣੇ ਦੂਜੇ ਬੱਚੇ ਦੇ ਜਨਮ ਤੋਂ ਤੁਰੰਤ ਬਾਅਦ ‘ਐਕਿਊਟ ਮਾਈਲੋਇਡ ਲਿਊਕੀਮੀਆ’ ਨਾਮਕ ਖ਼ਤਰਨਾਕ ਬਲੱਡ ਕੈਂਸਰ ਦਾ ਪਤਾ ਲੱਗਾ ਸੀ। ਜਨਮ ਤੋਂ ਬਾਅਦ ਡਾਕਟਰਾਂ ਨੇ ਉਨ੍ਹਾਂ ਦੇ ਸਰੀਰ ਵਿੱਚ ਚਿੱਟੇ ਲਹੂ ਦੇ ਸੈੱਲਾਂ (WBC) ਦੀ ਗਿਣਤੀ ਅਸਧਾਰਨ ਤੌਰ ‘ਤੇ ਜ਼ਿਆਦਾ ਪਾਈ।

ਇਹ ਕੈਂਸਰ ਆਮ ਤੌਰ ‘ਤੇ ਬਜ਼ੁਰਗਾਂ ਵਿੱਚ ਹੁੰਦਾ ਹੈ, ਪਰ ਤਾਤੀਆਨਾ ਵਿੱਚ ਇੱਕ ਦੁਰਲੱਭ ਜੈਨੇਟਿਕ ਮਿਊਟੇਸ਼ਨ ਸੀ, ਜਿਸ ਨੂੰ ‘ਇਨਵਰਜ਼ਨ 3’ (Inversion 3) ਕਿਹਾ ਜਾਂਦਾ ਹੈ। ਇਹ ਬਹੁਤ ਹੀ ਹਮਲਾਵਰ ਰੂਪ ਹੈ ਅਤੇ ਇਸਦਾ ਇਲਾਜ ਮੁਸ਼ਕਲ ਹੁੰਦਾ ਹੈ।

ਉਨ੍ਹਾਂ ਨੇ ਨਵੰਬਰ ਵਿੱਚ ‘ਦਿ ਨਿਊ ਯਾਰਕਰ’ ਮੈਗਜ਼ੀਨ ਵਿੱਚ ਇੱਕ ਦਿਲ ਨੂੰ ਛੂਹ ਲੈਣ ਵਾਲਾ ਲੇਖ ਲਿਖਿਆ ਸੀ, ਜਿਸ ਵਿੱਚ ਆਪਣੀ ਬਿਮਾਰੀ ਦੀ ਕਹਾਣੀ ਬਿਆਨ ਕੀਤੀ ਸੀ। ਉਨ੍ਹਾਂ ਨੇ ਕੀਮੋਥੈਰੇਪੀ ਦੇ ਕਈ ਦੌਰ ਅਤੇ ਦੋ ਸਟੈਮ ਸੈੱਲ ਟ੍ਰਾਂਸਪਲਾਂਟ ਕਰਵਾਏ ਸਨ, ਪਰ ਕੈਂਸਰ ਵਾਪਸ ਆ ਗਿਆ। ਲੇਖ ਵਿੱਚ ਉਨ੍ਹਾਂ ਲਿਖਿਆ ਸੀ, “ਮੇਰਾ ਪਹਿਲਾ ਖ਼ਿਆਲ ਇਹ ਸੀ ਕਿ ਮੇਰੇ ਬੱਚੇ, ਜਿਨ੍ਹਾਂ ਦੇ ਚਿਹਰੇ ਮੇਰੀਆਂ ਅੱਖਾਂ ਵਿੱਚ ਵਸੇ ਹੋਏ ਹਨ, ਮੈਨੂੰ ਯਾਦ ਨਹੀਂ ਰੱਖਣਗੇ।”

ਇੱਕ ਸ਼ਾਨਦਾਰ ਪੱਤਰਕਾਰ ਵਜੋਂ ਪਛਾਣ

ਤਾਤੀਆਨਾ ‘ਨਿਊਯਾਰਕ ਟਾਈਮਜ਼’ ਵਿੱਚ ਸਾਇੰਸ ਅਤੇ ਕਲਾਈਮੇਟ ਰਿਪੋਰਟਰ ਰਹਿ ਚੁੱਕੀ ਸੀ। ਉਨ੍ਹਾਂ ਨੇ ‘ਦਿ ਐਟਲਾਂਟਿਕ’ ਅਤੇ ‘ਵੈਨਿਟੀ ਫੇਅਰ’ ਵਰਗੇ ਵੱਡੇ ਅਦਾਰਿਆਂ ਲਈ ਵੀ ਲਿਖਿਆ। 2019 ਵਿੱਚ ਉਨ੍ਹਾਂ ਦੀ ਕਿਤਾਬ “Inconspicuous Consumption” ਆਈ ਸੀ, ਜਿਸ ਨੂੰ ਕਾਫੀ ਸਲਾਹਿਆ ਗਿਆ। ਉਹ ਹਮੇਸ਼ਾ ਕਹਿੰਦੀ ਸੀ ਕਿ ਵਾਤਾਵਰਣ ਨੂੰ ਬਚਾਉਣਾ ਸਿਰਫ਼ ਧਰੁਵੀ ਭਾਲੂਆਂ (Polar Bears) ਲਈ ਨਹੀਂ, ਸਗੋਂ ਲੋਕਾਂ ਲਈ ਜ਼ਰੂਰੀ ਹੈ।

ਰਿਸ਼ਤੇਦਾਰ ਆਰ.ਐਫ.ਕੇ. ਜੂਨੀਅਰ ਦੀ ਤਿੱਖੀ ਆਲੋਚਨਾ

ਆਪਣੇ ਲੇਖ ਵਿੱਚ ਤਾਤੀਆਨਾ ਨੇ ਆਪਣੇ ਚਚੇਰੇ ਭਰਾ ਰੌਬਰਟ ਐਫ ਕੈਨੇਡੀ ਜੂਨੀਅਰ ਦੀ ਸਖ਼ਤ ਆਲੋਚਨਾ ਕੀਤੀ ਹੈ, ਜੋ ਹੁਣ ਟਰੰਪ ਪ੍ਰਸ਼ਾਸਨ ਵਿੱਚ ਸਿਹਤ ਸਕੱਤਰ ਹਨ। ਉਨ੍ਹਾਂ ਲਿਖਿਆ ਕਿ ਹਸਪਤਾਲ ਦੇ ਬਿਸਤਰੇ ਤੋਂ ਉਹ ਦੇਖ ਰਹੀ ਸੀ ਕਿ ਕਿਵੇਂ ਆਰ.ਐਫ.ਕੇ. ਜੂਨੀਅਰ ਵੈਕਸੀਨ ਤੱਕ ਪਹੁੰਚ ਸੀਮਤ ਕਰ ਰਹੇ ਹਨ ਅਤੇ ਮੈਡੀਕਲ ਖੋਜ ਦੇ ਫੰਡ ਕੱਟ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਬਿਨਾਂ ਕਿਸੇ ਮੈਡੀਕਲ ਜਾਂ ਜਨਤਕ ਸਿਹਤ ਦੇ ਤਜ਼ਰਬੇ ਦੇ ਉਨ੍ਹਾਂ ਦਾ ਇਸ ਅਹੁਦੇ ‘ਤੇ ਹੋਣਾ ਤਰਕ ਦੇ ਖ਼ਿਲਾਫ਼ ਹੈ।