ਨਵੀਂ ਦਿੱਲੀ, 03 ਦਸੰਬਰ 2025 :- ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੀ ਸਟਾਰ ਸਮ੍ਰਿਤੀ ਮੰਧਾਨਾ ਅਤੇ ਮਿਊਜ਼ਿਕ ਕੰਪੋਜ਼ਰ ਪਲਾਸ਼ ਮੁਛੱਲ ਦੇ ਵਿਆਹ ਦੀ ਨਵੀਂ ਤਰੀਕ ਦਾ ਹਰ ਕੋਈ ਇੰਤਜ਼ਾਰ ਕਰ ਰਿਹਾ ਹੈ। ਸਮ੍ਰਿਤੀ ਮੰਧਾਨਾ ਦੇ ਪਿਤਾ ਨੂੰ ਦਿਲ ਦਾ ਦੌਰਾ ਪੈਣ ਕਾਰਨ ਉਨ੍ਹਾਂ ਦਾ ਵਿਆਹ ਜੋ 23 ਨਵੰਬਰ 2025 ਨੂੰ ਹੋਣਾ ਸੀ, ਮੁਲਤਵੀ ਹੋ ਗਿਆ। ਸਮ੍ਰਿਤੀ ਦੇ ਪਿਤਾ ਦੀ ਤਬੀਅਤ ਵਿਗੜਨ ਤੋਂ ਬਾਅਦ ਪਲਾਸ਼ ਦੀ ਸਿਹਤ ਵੀ ਖਰਾਬ ਹੋ ਗਈ ਅਤੇ ਉਨ੍ਹਾਂ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ।

ਹੁਣ ਦੋਵਾਂ ਦੀ ਸਿਹਤ ਠੀਕ ਹੈ ਪਰ ਅਜੇ ਤੱਕ ਸਮ੍ਰਿਤੀ-ਪਲਾਸ਼ ਦੇ ਪਰਿਵਾਰਾਂ ਨੇ ਵਿਆਹ ਦੀ ਨਵੀਂ ਤਰੀਕ ਬਾਰੇ ਕੋਈ ਐਲਾਨ ਨਹੀਂ ਕੀਤਾ ਹੈ। ਇਸ ਦੌਰਾਨ ਸੋਸ਼ਲ ਮੀਡੀਆ ‘ਤੇ ਇਹ ਅਫਵਾਹ ਫੈਲ ਗਈ ਕਿ ਸਮ੍ਰਿਤੀ-ਪਲਾਸ਼ ਦਾ ਵਿਆਹ 7 ਦਸੰਬਰ ਨੂੰ ਹੋ ਰਿਹਾ ਹੈ ਪਰ ਸਮ੍ਰਿਤੀ ਦੇ ਭਰਾ ਸ਼ਰਵਣ ਮੰਧਾਨਾ ਨੇ ਇਨ੍ਹਾਂ ਰਿਪੋਰਟਾਂ ਨੂੰ ਖਾਰਜ ਕਰ ਦਿੱਤਾ ਹੈ।

7 ਦਸੰਬਰ ਨੂੰ ਹੋਵੇਗਾ ਸਮ੍ਰਿਤੀ-ਪਲਾਸ਼ ਦਾ ਵਿਆਹ?

ਦਰਅਸਲ, ਹਿੰਦੁਸਤਾਨ ਟਾਈਮਜ਼ ਨਾਲ ਗੱਲਬਾਤ ਵਿੱਚ ਸਮ੍ਰਿਤੀ ਮੰਧਾਨਾ ਦੇ ਭਰਾ ਸ਼ਰਵਣ ਮੰਧਾਨਾ ਨੇ 7 ਦਸੰਬਰ ਨੂੰ ਹੋਣ ਵਾਲੇ ਸਮ੍ਰਿਤੀ-ਪਲਾਸ਼ ਦੇ ਵਿਆਹ ਦੀਆਂ ਖਬਰਾਂ ‘ਤੇ ਪੂਰਨ ਵਿਰਾਮ ਲਗਾਇਆ ਅਤੇ ਦੱਸਿਆ ਕਿ ਵਿਆਹ ਦੀ ਨਵੀਂ ਤਰੀਕ ਅਜੇ ਤੱਕ ਤੈਅ ਨਹੀਂ ਹੋਈ ਹੈ। ਉਨ੍ਹਾਂ ਕਿਹਾ ਕਿ “ਮੈਨੂੰ ਇਨ੍ਹਾਂ ਅਫਵਾਹਾਂ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ। ਫਿਲਹਾਲ ਇਹ (ਵਿਆਹ) ਅਜੇ ਵੀ ਮੁਲਤਵੀ ਹੈ।” ਦੂਜੇ ਪਾਸੇ ਪਲਾਸ਼ ਦੀ ਮਾਂ ਲਗਾਤਾਰ ਵਿਆਹ ਮੁਲਤਵੀ ਹੋਣ ਦੇ ਕਾਰਨ ਬਾਰੇ ਗੱਲ ਕਰ ਰਹੀ ਹੈ ਅਤੇ ਉਨ੍ਹਾਂ ਉਮੀਦ ਜਤਾਈ ਕਿ ਪਲਾਸ਼ ਅਤੇ ਸਮ੍ਰਿਤੀ ਦਾ ਵਿਆਹ ਬਹੁਤ ਜਲਦੀ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਵਿਆਹ ਵਾਲੇ ਦਿਨ ਜੋ ਵੀ ਹੋਇਆ, ਉਸ ਨਾਲ ਪਲਾਸ਼ ਅਤੇ ਸਮ੍ਰਿਤੀ ਦੁਖੀ ਹਨ। ਦੋਵਾਂ ਦੇ ਵਿਆਹ ਤੋਂ ਬਾਅਦ ਇੰਡੀਅਨ ਵਿਮੈਨਜ਼ ਕ੍ਰਿਕਟ ਟੀਮ ਨੇ ਦੋਵਾਂ ਲਈ ਇੱਕ ਖਾਸ ਸਵਾਗਤ ਵੀ ਪਲਾਨ ਕੀਤਾ ਸੀ।

ਕਿਸ-ਕਿਸ ਨਾਲ ਜੁੜਿਆ ਪਲਾਸ਼ ਦਾ ਨਾਂ?

ਸਮ੍ਰਿਤੀ ਮੰਧਾਨਾ ਨਾਲ ਵਿਆਹ ਟਲਣ ਤੋਂ ਬਾਅਦ ਪਲਾਸ਼ ਮੁਛੱਲ ਦਾ ਨਾਂ ਸਭ ਤੋਂ ਪਹਿਲਾਂ ਮੈਰੀ ਡੀਕੋਸਟਾ ਨਾਂ ਦੀ ਇੱਕ ਕੋਰੀਓਗ੍ਰਾਫਰ ਨਾਲ ਜੁੜਿਆ। ਪਲਾਸ਼ ਦੀ ਮੈਰੀ ਨਾਲ ਇੱਕ ਫਲਰਟੀ ਚੈਟ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਗਈ। ਇਸ ਤੋਂ ਬਾਅਦ ਨੰਦਿਕਾ ਦਿਵੇਦੀ ਅਤੇ ਗੁਲਨਾ ਜ਼ਖਾਨ ਨਾਂ ਦੀ ਲੜਕੀ ਨਾਲ ਵੀ ਪਲਾਸ਼ ਦਾ ਨਾਂ ਸਾਹਮਣੇ ਆਇਆ। ਇਸ ਪੂਰੀ ਘਟਨਾ ਕਾਰਨ ਪਲਾਸ਼ ਵੀ ਸਦਮੇ ਵਿੱਚ ਚਲੇ ਗਏ ਅਤੇ ਸਿਹਤ ਖਰਾਬ ਹੋਣ ਕਾਰਨ ਉਨ੍ਹਾਂ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਉਣਾ ਪਿਆ। ਹੁਣ 10 ਦਿਨਾਂ ਬਾਅਦ ਇੱਕ ਵਾਰ ਫਿਰ ਪਲਾਸ਼-ਸਮ੍ਰਿਤੀ ਮੰਧਾਨਾ ਦੇ ਵਿਆਹ ਦੀ ਗੱਲ ਹੋਣ ਲੱਗੀ ਹੈ।